பஸ் கட்டண உயர்வை ரத்து செய்யாவிட்டால் அடுத்த கட்டமாக தீவிர போராட்டம்: மு.க.ஸ்டாலின் எச்சரிக்கை

தமிழக அரசின் பஸ் கட்டண உயர்வை கண்டித்து தி.மு.க. மற்றும் அதன் ஆதரவு காட்சிகள் இன்று சாலை மறியல் போராட்டத்தில் ஈடுபட்டனர்.

கொளத்தூரில் பஸ் மறியலில் ஈடுபட்டு கைதான தி.மு.க. செயல் தலைவர் மு.க.ஸ்டாலின் நிருபர்களிடம் கூறியதாவது:-

அ.தி.மு.க. ஆட்சி அறிவித்துள்ள பேருந்து கட்டண உயர்வைக் கண்டித்தும், பேருந்து கட்டணத்தை உடனடியாக முழுமையாக ரத்து செய்ய வேண்டும் என வலியுறுத்தியும் தமிழகம் முழுவதும் நடைபெற்றுள்ள மிகப்பெரிய மறியல் போராட்டங்களில் தி.மு.க., காங்கிரஸ், ம.தி.மு.க., மார்க்சிஸ்ட் கம்யூனிஸ்ட், இந்திய கம்யூனிஸ்ட், இந்திய யூனியன் முஸ்லீம் லீக், மனித நேய மக்கள் கட்சி, விடுதலை சிறுத்தைகள் உள்ளிட்ட தோழமைக் கட்சிகள் மற்றும் பல்வேறு அமைப்புகளை சேர்ந்த லட்சக்கணக்கானோர் பங்கேற்றனர்.

போக்குவரத்துத்துறை என்பது பொதுமக்களுக்கு சேவை செய்யும் துறை என்பதை கருத்தில் கொண்டு, 2006 முதல் 2011 ஆம் ஆண்டு வரையிலான தலைவர் கலைஞர் தலைமையிலான தி.மு.க. ஆட்சியின்போது, பேருந்து கட்டணத்தில் ஒரு சல்லிகாசு கூட உயர்த்தப்படவில்லை.

கடந்த 2006 ஆம் ஆண்டு அதிமுக ஆட்சி முடிவுக்கு வந்தபோது, தினசரி டிக்கெட் கலெக்‌ஷன் 12 கோடியே 90 லட்சம் என்ற அளவில் இருந்தது. கழக ஆட்சியில் கட்டண உயர்வு எதுவும் இல்லாத நேரத்திலும், தினசரி பேருந்து கட்டண வருவாய் 20 கோடியே 46 லட்சமாக அதிகரித்தது. அந்தளவுக்கு மக்களின் நண்பனாக போக்குவரத்துக்கழகத்தை மாற்றியது தலைவர் கலைஞர் தலைமையிலான தி.மு.க. அரசு.

ஆனால், இப்போது 50 சதவீதம், 108 சதவீதம் என அதிமுக அரசு பேருந்து கட்டணத்தை உயர்த்தி இருக்கிறது. எனவே, யாருடைய இதயத்தில் ஈரம் இருந்தது என்பதை பொதுமக்கள் தெளிவாகவே புரிந்து கொண்டு இருக்கிறார்கள்.

எனவே, இப்போதைய கட்டண உயர்வுக்கு, எடப்பாடி பழனிசாமியின் நிர்வாக தோல்விதான் காரணமே தவிர, போக்குவரத்துக் கழகங்களின் தோல்வி அல்ல என்பதை சுட்டிக்காட்ட விரும்புகிறேன்.

பேருந்து பயண கட்டணங்களை உயர்த்தும் அதிகாரத்தை போக்குவரத்துத்துறை அதிகாரிகளுக்கு வழங்கப்படுவதாக, அரசு வெளியிட்டுள்ள செய்திக்குறிப்பில் தெரிவிக்கப்பட்டு இருக்கிறது. அதையும் உடனே திரும்பப் பெற வேண்டும்.

இன்றுடன் முடிவடைந்து விடக்கூடியதாக இந்தப் போராட்டம் இருக்காது. நேற்றைய தினம், பேருந்து கட்டணத்தை குறைத்திருப்பதாக ஒரு கபட நாடகத்தை நடத்தி இருக்கிறார்கள்.

இந்த கோரிக்கைகளை எல்லாம் அரசு உடனே நிறைவேற்றாவிட்டால், அடுத்த கட்டமாக இதைவிட தீவிரமான போராட்டங்களை முன்னெடுக்க திட்டமிட்டு இருக்கிறோம். எனவே, விரைவில் மீண்டும் அனைத்து கட்சி கூட்டம் கூட்டி, அதற்கான அறிவிப்பை வெளியிடுவோம்.

பேருந்து கட்டண உயர்வை எதிர்த்து போராடிய அரசியல் கட்சியினர், மாணவர்கள் பலர் கைது செய்யப்பட்டுள்ளனர். அவர்கள் அனைவரையும் விடுவிக்க வேண்டும் என இப்போராட்டம் வாயிலாக வலியுறுத்துகிறோம்” எனக் கூறினார்.

 


கருத்துக்களை பகிர


அல்லது

Your email address will not be published.

Scroll To Top