தமிழக அரசை பா.ஜ.க. தனது கட்டுப்பாட்டில் வைத்துள்ளது: திருநாவுக்கரசர்

ஈரோடு மாவட்டம் அரச்சலூர் ஓடாநிலையில் தீரன் சின்னமலை சிலைக்கு தமிழ்நாடு காங்கிரஸ் கமிட்டி தலைவர் திருநாவுக்கரசர் மாலை அணிவித்தார். பின்னர் அவர் நிருபர்களிடம் கூறியதாவது:-

இந்திய திருநாட்டுக்கும், இந்திய மக்களின் சுவாச காற்றுக்கும் வித்திட்டவர் தீரன் சின்னமலை. ஆங்கிலேயர் ஆதிக்கத்தை எதிர்த்து வீரத்துடன் போரிட்டு வெற்றி பெற்றார்.

எப்படி வீரபாண்டிய கட்டபொம்மனை சூழ்ச்சியால் கைது செய்து தூக்கிலிட்டார்களோ அதேபோல தீரன் சின்னமலையையும் தூக்கிலிட்டனர்.

அ.தி.மு.க. இணைப்புக்கு பல குழுக்கள் அமைத்தனர். அந்த குழு கலைக்கப்பட்டது என்று அவர்களே சொல்கிறார்கள். அ.தி.மு.க.வில் தெளிவற்ற நிலை உள்ளது.

இதன் எதிரொலியாகத்தான் இரட்டை இலை சின்னம் முடக்கப்பட்டது. இதற்கு காரணம் பாரதிய ஜனதா சூழ்ச்சிதான்.

பாரதிய ஜனதா தனது அதிகார பலத்தை பயன்படுத்தி தமிழகத்தில் காலூன்ற முயற்சிக்கிறது. அதற்கு அ.தி.மு.க.வை அவர்கள் பயன்படுத்துகிறார்கள்.

ஜனாதிபதி தேர்தலில் பாரதிய ஜனதா வேட்பாளரை அ.தி.மு.க. ஆதரித்தது. ஆனால் ஆதரவு கொடுப்பதை வைத்து மத்திய அரசுக்கு தமிழக அரசு எந்த ஒரு நிர்பந்தமும் கொடுக்கவில்லை.

தமிழகத்தில் பல பிரச்சனைகள் உள்ளன. நீட் தேர்வுக்கு விலக்கு கேட்டு பெற்றிருக்கலாம். விவசாயிகளுக்கு வறட்சி நிவாரணம் கேட்டு பெற்றிருக்கலாம். ஆனால் எந்த நிர்பந்தத்தையும் மத்திய அரசுக்கு கொடுக்கவில்லை.

ஏனென்றால் தமிழக அரசு செயல்படாத அரசாக உள்ளது. அதனால்தான் தமிழக அரசை பாரதிய ஜனதா தனது கட்டுப்பாட்டுக்குள் வைத்துள்ளது.

அமைச்சர்களை அச்சுறுத்தி பாரதிய ஜனதா அரசு தனது காரியத்தை சாதிக்கிறது. காங்கிரஸ் ஆட்சி செய்யும் மாநிலங்களில் பாரதிய ஜனதா குழப்பத்தை செய்து வருகிறது.

இதற்கு உதாரணமாக புதுச்சேரி, குஜராத் மாநிலத்தில் நடக்கும் அரசியல் விவகாரங்களையும், கர்நாடக மந்திரி வீட்டில் நடந்த வருமான வரி சோதனையையும் சொல்லலாம்.

கர்நாடகாவில் சோதனை நடத்திய வருமான வரித்துறை தமிழக எம்.எல்.ஏ.க்கள் கூவத்தூரில் தங்கி இருந்தபோது ஏன் அங்கு சோதனை நடத்தவில்லை?

ஜெயலலிதா வாழ்ந்த போயஸ் கார்டனை நினைவு இல்லமாக மாற்ற தமிழக அரசு நடவடிக்கை எடுக்க வேண்டும்.

இவ்வாறு திருநாவுக்கரசர் கூறினார்.


கருத்துக்களை பகிர


அல்லது

Your email address will not be published.

Scroll To Top