ரஷ்யா, ஈரான் மற்றும் வடகொரியா மீது புதிய பொருளாதார தடை அமெரிக்க பாராளுமன்றத்தில் மசோதா நிறைவேற்றியுள்ளது

us

ரஷ்யா, ஈரான் மற்றும் வடகொரியா மீது புதிய பொருளாதார தடை விதிக்க வகை செய்யும் மசோதா அமெரிக்க நாடாளுமன்ற பிரதிநிதிகள் சபையில் (கீழ் அவை) பெரும்பான்மை உறுப்பினர்களின் ஆதரவுடன் நிறைவேறி உள்ளது.

அமெரிக்கா மற்றும் அதன் நட்பு நாடுகளுக்கு எதிரான செயலில் ஈடுபடுவதாகக் கூறி தாக்கல் செய்யப்பட்ட இந்த மசோதாவுக்கு ஆதரவாக 419 உறுப்பினர்களும் எதிராக வெறும் 3 உறுப்பினர்களும் வாக்களித்தனர்.

தற்போது இந்த மசோதா செனட் சபைக்கு அனுப்பி வைக்கப்படுகிறது. அங்கும் இந்த மசோதாவுக்கு ஆதரவு உள்ளது. தீவிரவாதத்துக்கு ஆதரவளித்து வருவதற்காக ஈரான் மீதும் அதே நேரத்தில், வடகொரியா மீது தண்டனை விதிக்க வேண்டுமா என்பதில் விவாதம் உள்ளது. செனட் சபையில் இந்த மசோதா நிறைவேறிய பின்னர் ஜனாதிபதி டிரம்ப் கையெழுத்திட்டவுடன் சட்டமாகி விடும்.

இதுகுறித்து பிரதிநிதிகள் சபை தலைவர் பால் ரயன் கூறும்போது, “அமெரிக்காவின் பாதுகாப்பு கருதி, எதிரி நாடுகளுக்கு எதிராக புதிய பொருளாதார தடை விதிக்க முடிவு செய்யப்பட்டுள்ளது. இது வரலாற்றில் மேற்கொள்ளப்பட்ட மிகப்பெரிய நடவடிக்கைகளில் ஒன்றாகும்” என்றார்.

பிரதிநிதிகள் சபையின் வெளியுறவு விவகாரங்கள் குழுத் தலைவரும் இந்த மசோதாவை வடிவமைத்தவருமான எட் ராய்ஸ் கூறும்போது, “உலகின் வெவ்வேறு பகுதியில் உள்ள இந்த மூன்று நாடுகளும் அமெரிக்காவுக்கு மிகப்பெரிய அச்சுறுத்தலாக இருக்கின்றன. அத்துடன் தங்களது பக்கத்து நாடுகளைச் சீர்குலைக்கும் நடவடிக்கையிலும் ஈடுபட்டு வருகின்றன. எனவேதான் இந்த நடவடிக்கை எடுக்க வேண்டிய கட்டாயம் ஏற்பட்டுள்ளது” என்றார்.

செனட் சபையின் சிறுபான்மையின தலைவர் சார்லஸ் ஸ்கூமர் கூறும்போது, “அமெரிக்க அதிபர் தேர்தலில் தலையிட்டதை சகித்துக் கொள்ள முடியாது என்ற கடுமையான சமிக்ஞையை ரஷ்ய அதிபர் விளாடிமிர் புதினுக்கு தெரிவிக்கும் வகையில் இந்த மசோதா ஆளும், எதிர்க்கட்சி உறுப்பினர்களின் ஆதரவுடன் நிறைவேற்றப்பட்டுள்ளது” என்றார்.


கருத்துக்களை பகிர


அல்லது

Your email address will not be published.

Scroll To Top