குடிநீர் பஞ்சம்; சென்னை முழுவதும் லாரிகள் மூலம் தண்ணீர் சப்ளை

 

5Metro Water

 

 

வட கிழக்கு பருவமழை பொய்த்து போனதால் கடந்த ஆண்டு தமிழகத்தில் உள்ள அணைகள், ஏரிகளின் நீர்மட்டம் பெருமளவில் குறைந்து விட்டன. இதனால் பெரும்பாலான அணைகள், ஏரிகள் வறண்டு பாலைவனம் போல் காட்சி அளிக்கின்றன.

சென்னை மற்றும் அதனை சுற்றியுள்ள பகுதிகளில் உள்ள ஏரிகளின் நீர்மட்டங்களும் வெகுவாக குறைந்து வருகின்றன. சென்னைக்கு தேவையான குடிநீர் வழங்கும் ஏரிகள் வறண்டு போனதால் குடிநீர் தட்டுப்பாடு ஏற்படும் அபாயம் உள்ளது.

அந்த ஏரிகளில் இருந்து சென்னைக்கு இன்னும் எத்தனை நாட்களுக்கு தண்ணீர் கொடுக்க முடியும் என்று விரல் விட்டு எண்ணி சொல்லக்கூடிய அளவுக்கு நீர்மட்டம் குறைந்துள்ளது. இது ஒரு புறம் இருக்க, நிலத்தடி நீர்மட்டமும் வெகுவாக குறைந்து இருப்பதாக சென்னை குடிநீர் வாரியம் தெரிவித்து உள்ளது.

இந்தநிலையில் சென்னையில் குடிநீர் பஞ்சம் வந்துவிடக்கூடாது. அதற்கு ஏற்றாற்போல் என்னென்ன முன்னெச்சரிக்கை நடவடிக்கை எடுக்க வேண்டும் என்ற முனைப்புடன் சென்னை குடிநீர் வாரியம் ஈடுபட்டு உள்ளது.

சென்னை மாநகராட்சிக்கு உட்பட்ட 200 வார்டுகளுக்கு ஏற்கனவே லாரிகள் மூலம் குடிநீர் சப்ளை செய்யப்பட்டு வருகிறது. தற்போது ஏற்பட்டு இருக்கும் குடிநீர் தேவையை சமாளிக்க லாரிகளில் வழங்கப்பட்டு வந்த குடிநீர் சப்ளையின் அளவை சென்னை குடிநீர் வாரியம் அதிகரித்து உள்ளது.

இதுகுறித்து சென்னை குடிநீர் வாரிய அதிகாரிகள் கூறியதாவது:-

வள்ளுவர் கோட்டம், மாத்தூர், கே.கே.நகர், எம்.ஆர்.சி.நகர், பள்ளிப்பட்டு, கொளத்தூர், கள்ளிக்குப்பம், ஈக்காட்டுத்தாங்கல், வேளச்சேரி உள்பட 36 இடங்களில் இருந்து லாரிகள் மூலம் சென்னை மாநகராட்சிக்கு உட்பட்ட 200 வார்டுகளுக்கு குடிநீர் சப்ளை செய்யப்பட்டு வருகிறது.

நாளொன்றுக்கு 520 லாரிகள் மூலம் 4 ஆயிரத்து 200 முறை மேற்கூறப்பட்ட 36 இடங்களில் இருந்து குடிநீர் எடுத்து செல்லப்பட்டு பொதுமக்களின் தேவை பூர்த்தி செய்யப்பட்டு வந்தது. தற்போது பல இடங்களில் குடிநீர் தட்டுப்பாடு ஏற்பட்டுள்ளதால் நாளொன்றுக்கு 6 ஆயிரத்து 500 முறை குடிநீர் எடுத்து செல்லப்பட்டு பொதுமக்களுக்கு வழங்கப்பட்டு வருகிறது.

இதுதவிர திருவள்ளூர் மாவட்டத்தில் உள்ள 300 விவசாய கிணறுகளில் இருந்தும் தண்ணீர் எடுக்கப்பட்டு அந்த தண்ணீர் அந்த மாவட்டத்தை ஒட்டியுள்ள குடிநீர் வாரியத்துக்கு சொந்தமான 10 பெரிய தொட்டிகளில் சேர்த்து வைத்து பின்னர், அங்கிருந்து புழல் ஏரிக்கு கொண்டு வரப்படுகிறது. புழல் ஏரியில் இருந்து சென்னை மக்களின் குடிநீர் தேவை பூர்த்தி செய்யப்பட்டு வருகிறது. அதுமட்டுமல்லாமல், நெம்மேலி, மீஞ்சூர் ஆகிய இடங்களில் அமைக்கப்பட்டு உள்ள கடல்நீரை குடிநீராக்கும் திட்டத்தின் மூலம் தலா 100 மில்லியன் லிட்டர் குடிநீர் வடசென்னை, தென்சென்னை மக்களுக்கு கொண்டு சேர்க்கப்படுகிறது.  இவ்வாறு அவர் கூறினார்

 


கருத்துக்களை பகிர


அல்லது

Your email address will not be published.

Scroll To Top